James 2
Awoum kuvna̱ses teitan o kupiyaves son
1Sigwey yakamiy, daGuyaws Yeisuw Kelis ansinap kamnat. Magat bukusimounids waseg Yeisuw, awoum bukwasigumis gamag mwasanin, o kuvna̱ses sisiy; awoum.2Kukin gamag asteiy bimeis wasinagog, wamitapwa̱loul, teitan anakweim maynamnabwein, antuwetuw wanaman goul-wan; teitan gog tasimav, anakweim sigsa̱gob, kukin bukuvna̱ses towen anakweim maynamnabwein, o kulansa, “Kum, kusin wanakaew wa̱keb,” o kukin bukudibakes towen tasimav, kulana, “Kun, kusin watinow,” adok peinan kwasigumis towen tasimav, kukwatukins gamag wasigeis; bo kalbaleb amisinap towen.
5Sigwey bwanabwein yakamiy kunages agulivan. Yowbad sivinan tasiyas tasimavs va̱gan bisimounids bwein waseg Yowbad. Anilivan mounid bo isekes, peinan isiwa̱youbs waseg; igaw mo beisiws wanakabkaleiwag. E, tasiyas tasimavs isimounids waseg Yowbad mo beisiws wanakabkaleiwag.
6Tage nukuyagages tasiyas tasimavs. Asimwasin. Bo igak! Kalisiy tayakeikays wasigeis yakamiy? Kalisiy iyateleimiy? Adok tasiyas guyawaw mwasanin.
7O tasiyas mwasanin iyages yagan datoveks Yeisuw.
8Kukwakins datoveks nakaleiwag kweiboug, Bukitab waseg, mamagina,
“Kadiloka bukuvnas soum, ma̱wana kuvna̱seim tatoneim.”
Kukin bukwanawes livan towen beibwein, mo beibwein amisinap yakamiy.
9Kukin gog bukuvna̱ses gamag mwasanin o bukwasigumis gamag mwasanin, bogo amisinap kalbaleb, peinan kusiplaves Yowbad nakaleiwag.
10Kal yak bukuvnas Yowbad nakaleiwag babaw, tage sinap katanok waseg bukukwalouw, bo bigeg amsinap; mamagina youd babaw wasigeis bo nukukwalouw.
11Tamads gog nilivan, “Awoum kusubwan,” nilivan-vak, “Awoum kuweiy gamag.” Anmwa̱neta Yowbad anilivan tasiyas. Magat bukuweiy gamag, tage nag kusubwan, bogo takalbaleb ya̱koum, peinan bo kusiplev Yowbad nakaleiwag.
12Kadiloka bukuvna̱ses beibwein amilivan o amisinap. Yowbad nakaleiwag waseg bo ilikuds mo taneis wamnat. Igaw nakaleiwag towen waseg bo bikatkineids.
Kukin nag binok nuwam soum, Yowbad nag binok nuwan ya̱koum. Tage binok nuwam soum, Yowbad mo binok nuwan ya̱koum; nag bikamta̱nim, nag.
Bitasimounid waseg Yeisuw kadiloka bitakanow aygan
14Sigwey yakamiy, kukin kal idoki bisimounid waseg Yeisuw, tage nag bikanow aygan, adok bo isimounid mav. Yeisuw nag bikatinob gamag towen.15Kal yak bukunek tayakelesiy teitan o na̱tan, anamoun isesuna, anakweim sigsa̱gob, bukudibek kulana, “Amkweim kupwa̱lum, bimuymuy woum; kam kukwam bukwamuweip, e mo kumwa̱saw,” tage nag kweitan kweim bukusek, o nag kweitan kan; adok bo kulivan mav ya̱koum.
17Kukin bukusimounid, tage nag kwanow Yeisuw aygan, mo bukusimounid mav; magina simounid bo ikanig waseg ya̱koum.
18Adok gamag teitan bidibakeim, bilana, “Ya̱koum kusimounid waseg Yeisuw; yey gog akanow aygan.”
Kukin nag kweitan nawotet Yeisuw bukuwtel, ama̱wan bukusimounid? Tage yey asimounid, mapuna bukukines Yeisuw nawotet nawtel.
19Adok kusimounids peinan Yowbad anmwa̱net nises. Bwein! Tage simounid sinap towen waseg nag kadilok. Tasiyas baloum-vak isimounids, to ivag aspwa̱yata singay.
20Takabala̱wein yak, adok bakatimlakeim makava simounid nag bilabeim. Anagin nag. Tage simounid son wotet bo bilabeim.
21Kunuw tabuds Ebelam, ikanow Yowbad aygan; magina itam natun Aysak, isek Yowbad, nakabeilun waseg. Mapuna Yowbad idok tadidumwal towen.
22Kuninuways Ebelam isimounid mo iwotet, o nawotet waseg takakin singay isimounid bwein.
23Sinap towen mamagina,
“Ebelam isimounid Yowbad waseg, mapuna idok Ebelam tadidumwal.”
Mapuna idokes veiyon Yowbad, mtowen Ebelam.
24Taninuways igaw bitasimounids waseg Yeisuw, bitakawes nawotet mo Yowbad bidokeids tadidumwals ya̱kids. Makava simounid nag bikadilok.
25Nakubukwab na̱wen yagan Leyab kweiboug ansinap ma̱wan, Yowbad idok nadidumwal peinan ileb Yosuw nagamag asteiy, ikidumwa̱lus, mo itanouys bwein kweitan ked waseg.
26Takakins geg kal won ta-ivag kululuwan, mounida takanig tonen. Ma̱wana simounid, ta-ivag nawotet, mounida kanig.
Copyright information for
MYW